سيستم الكروز – مثبت السرعة

السادة الأعضاء الأفاضل.. أعضاء جروبنا العزيز جروب كمل عربيتك

قد جاء الموعد المنتظر فى الأعلان عن مخطط التوصيل الخاص بتركيب كنترول الكروز (مثبت السرعة) لألنترا HD (جميع الموديلات من 2007 الى 2020)

يرجى العلم ان التوصيل يحتاج الى تعديلات فى الضفيره ، و تعديل بسيط فى البوابة

نبدأ و نقول بسم الله الرحمن الرحيم

الكروز (مثبت السرعة)

فى البداية مرفق لكم فى هذا البوست قائمة بأشكال الفيش plugs اللى هيتم التعديل عليها ،، و مخطط التوصيل Wire diagram مع الشرح و اتمنى ان يكون الشرح واضح بأمر الله

بالنسبالي لم اواجه مشكلة فى التوصيلات الكهربائية ،، و لكن الحاجة المهمة بالنسبالي و هى يا ترى ازاى هيتم توصيل الكيبل الخارج من كنترول الكروز (اللى مكانه اقصى يمين السياره) الى البوابة اللى مكانها فى منتصف السياره تقريباً

التريكاية فى الحوار كله

• هيتم استخدام سلك دبرياج بتاع توكتوك ،، ايوه حضرتك زي ما انا بقولك كده ،، و ده لأن سلك التوكتوك طوله حوالي 3 متر و احنا هناخد منه الطول اللى احنا عايزينه و الباقى نقصه عادى
• طرف هيتم توصيله فى كنترول الكروز و الطرف الثاني هيتم توصيله فى البوابه ،، و فى نهاية هذا الطرف هيتم توصيل السلك بحاجه اسمها لاكور و برضه حضرتك تقدر تشتريه من بتوع قطع غيار التوكتوك و الموتوسيكلات

البوابة:

التعديل اللى انا عملته فيها اننى ركبت اكس جديد على البوابة لسحب الواير القادم من كنترول الكروز عليها ،، و الأكس جيبته من كبراتير قديم كان عندى ،، و يمكنكم الأبتكار و التفكير فى هذه النقطة و كل واحد يبدع في ذلك فالفكرة ليست محتكرة على شىء واحد ،، فأحنا كل اللى عايزينه هو حاجه تشد عليها الواير و يكون له القدره على سحب و فتح البوابه معاه

و مرفق صورة بشكل التعديل اللى انا استخدمته عندى

المكونات الأساسية:

• كنترول الكروز (موضح فى الصور) و ياريت تجيبه بالفيشة بتاعته
  Part Number: 96400-2H100

• لو وجدت صعوبة فى توفير الفيشة ،، فممكن تشتريها اون لاين من هنا
  https://www.ebay.com/itm/CAR-MOTORCYCLE-WATERPROOF-12-PIN-ELECTRICAL-1-8MM-AWG-WIRE-CONNECTOR-PLUG/264165862184

• وحدة ازار التحكم التى سيتم تركيبها فى طارة الدركسيون (مرفق صورة لها)

• حوالى 3 متر سلك (للطرف الواحد) و احنا هنحتاج هنا 9 أطراف بنفس الطول للتوصيل من فيشة الكروز الى ضفيرة التابلوه من الداخل (يفضل الوان مختلفة)

• سلك دبرياج توكتوك

انا قمت بشراء ازرار التحكم و كنترول الكروز بالفيشة بتاعته من امريكا لذلك البوست يفتقر لأى اسعار للأسف

التوصيل و التركيب حسب مخطط التوصيل ،، انا موضح اشكال الفيش اللى هيتم التعامل عليها و ارقام اطراف الأسلاك

و الفكرة كلها و التى بتمد الطاقة لكنترول الكروز ،، هى فيشة ماكينة الفرامل

هناك مشكلة و يمكن تفاديها لو مشيت على نفس المخطط اللى انا عامله ده ،، و هو ان عداد الألنترا الموجود فى مصر سواء العداد العادى او السوبر فيجن مش سبورت للكروز ،، بمعنى ان لمبات الليد بتاعت الكروز مش موجودة فيه و حتى و ان قمت بلحام الليدات فيه ، فاللأسف مش هتشتغل لأن هتحتاج تلحم معاها عدد من المقاومات لتكتمل الدايرة،، و يمكن تفادى هذه المشكلة و تجنبا لأجراء اى تعديل على العداد .. و هى يمكن التوصيل على اطراف لمبات اخرى و هم لمبة ESP + ESP Off ،، او فى العداد السوبر فيجن بأسم VDC + VDC Off و هذه الليدات موجودة بالفعل فى العداد

هذه اللمبات هى خاصة بنظام الثبات الألكتروني
Electronic Stability Program ، و هذا النظام غير متوفر فى الـ HD الا فى موديلات محدودة جداً ،، لذلك من الممكن استغلان لمبات البيان الخاصة بهم

ملحوظة: الصورة الأخيره هى فى حالة اردت تشغيل ازرار الكروز مع ازرار التحكم فى الصوت ،، و هى لدمج الأزرار مع بعض ،، و موضح فيها اطراف الأسلاك التى سيتم نقلها من فيشة تحكم الكروز الى فيشة تحكم الصوت

ده فيديو لتجربة مدى فعالية تفعيل السيستم على الطريق

فى النهاية: اى خطأ فى التوصيلات انا غير مسئول عنه ، و انا عن نفسي قمت بالتوصيل فى عربيتي بناءاً على مخطط الأسلاك المرفق لكم ، و الذى حاولت ان يكون سهل المنال بالنسبة الى السادة الأعضاء

دمتم بكل ود ، و بعتذر عن التأخير و ياريت دعوه حلوه من حضراتكم لأن العربيه كانت هتتسرق امبارح و الحمدلله كان لطف الله عظيم و قدرت ألحق الأمر قبل فوات الأوان

جروب كمل عربيتك هو المرجع الأول و الأخير للتعديلات الحصرية فى ألنترا HD ، لأننا ببساطة بنفعل الأمر على عربياتنا لأننا ملاك مثلكم نحب اضافة إليها كل شىء جميل حصري و فريد من نوعه

مع تحياتى

م/مدحت النكلاوي