مؤخراً كثرت الأسئلة عن متطلبات تركيب سيستم امان مهم و حبيت النهاردة اشاركم و نتكلم عنه و هو سيستم الأيرباج Airbag لألنترا HD
———–
بسم الله الرحمن الرحيم
ايه هى المتطلبات الأساسية لتشغيل و أضافة منظومة الأيرباج الى سيارة النترا HD 
؟
نبدأ على بركة الله و ورقه و قلم و اكتب ورايا: >>>
- ضفيرة تابلوه (لو انت قالب العربيه من مانوال الى اوتو مش هتحتاج الضفيره دى لأنك غالباً غيرتها بالفعل)
- ضفيرة سدر (جنب يمين) (لو انت قالب العربيه من مانوال الى اوتو مش هتحتاج الضفيره دى لأنك غيرتها بالفعل)
- ضفيرة جنب شمال
- عدد 2 حساس صدمات امامية
- كنترول إيرباج
- عدد 2 حزام امان (حسب اللون بيج او رمادي)
- كبسولة ايرباج لتارة الدركسيون
- كبسولة ايرباج للتابلوه
- قشرة تابلوه
- شريط ايرباج
مرفق لكم عدد من الصور لمنظومة الأيرباج 
ملوظة: يرجى العلم بأن قشرة التابلوه في منها لونين و هم على حسب لون الصالون الداخلي لسيارتك سواء كان بيج و هنا هتحتاج القشرة تكون لونها بني محروق ،، او اذا كان رمادى و هنا هتكون القشرة لونها اسود)
ملحوظة تانية: اللون البيج نادراً جداً و هتحتاج تلف عليه كتير و يكون من حسن حظك اذا وجدته ،، او ممكن تعمل زى ما انا عملت و تعمل اوردر باللى انت عايزه من امريكا لكن طبعاً التكلفة هتزيد فى هذه الحالة
كل المتطلبات دى حضرتك بتشتريها استيراد ، و الأسعار متفاوتة حسب كل تاجر
——————–
طيب انا جيبت الحاجت المطلوبه ،، اروح بيها على فين ؟
- اذا كنت تمتلك الصبر و لديك الشغف فمن الممكن تركب القطع بنفسك ،، او تذهب الى كهربائي يكون لديه نفس الصبر و مهمته هتكون فك و تركيب الأجزاء و الحاجات التى تم شرائها اعلاه و خد بالك ان المسألة هتستغرق حبة وقت
——————–
هام جداً جداً:
فى البداية احنا بنركب سيستم الأيرباج للقيام بوظيفته الأساسية و المصمم لها و هى حماية قائد السيارة و الراكب اللى بجواره ، و ليس عشان تنور فى التابلوه لمبة تفيد بوجود ايرباج فى السيارة نتفاخر بيها و السلام
- اذا لم تجد احزمة الأمان ،، فلا تقم بتركيب السيستم بدونها لأنه لن يعمل
- اذا لم تجد احزمة الأمان ،، فلا تقم بتركيب مقاومات عشان تعمل bypass و تضحك بيها على كنترول الأيرباج بأن الأحزمة موجودة ،، لأنه ببساطة انت بتضحك على نفسك بذلك و بتعرض نفسك الى الخطر
وظيفة الأحزمة فى منظومة الأيرباج هى ان كنترول الأيرباج بيعطي امر لوك/قفل للأحزمة فور حدوث التصادم لا قدر الله ،، و هذا ليزيد من احكام أمساك الراكب فى مكانه ،، و ايضاً لتجنب اصطدام جسم الراكب بالكبسولة عند انفجارها ،، لأن لحظة الأنفجار ممكن تتسبب فى احداث اصابات خطيرة
لذلك حذاري من تركيب مقاومات الأيرباج
ربنا يسترها مع الجميع 
فى النهاية ما ورد فى هذا البوست هو من واقع تجربة شخصية و بحث و تنفيذ قمت به فى سيارتي و ليس كلام مرسل 
البوست حصري لموقع Elantra-HD.com و لجروب كمل عربيتك ضمن سلسلة أعرف و تعلم و استمتع بمعشوقتك
تم بحمدلله و تحياتي للجميع 
م/مدحت النكلاوي
